بقلم :
نورهان شاهين
إذا تعالى عليك شيء أهنه بالتخلي… من أكتر الجمل اللي بتعامل بيها وتريحني… حط لنفسك قيمه وخليك عارف انك حاجه كبيره اوي ومهمه ومفيش حد في الدنيا أحسن منك عشان يتعالى عليك أو يكون (تنك) معاك وكمان تجري وراه … اللي يشوف نفسه عليك أديله على قد قدره واديله ضهرك بقلب جامد ..وريله يعني ايه تخلي فعلا
ودا مش شر ..بس اللي قدامي لو بيحبني عمره ما يتعالى ويتكبر عليا.. ناهيك عن أنها صفه لاتنم غير عن شخص ضعيف وعنده مركب نقص فمحتاج منك تعرفه حجمه بانك تديله ضهرك.. كتير أوي بيكون قدامنا شخص هش وضعيف وناقص واحنا اللي بنكبره وننفخه ولما يتنطط علينا بنزعل.. بلاش تتعودوا تدوا حد أكبر من حجمه لانه للاسف طالما ناقص هيتنك عليك انت ويتعدل مع اللي بيعرف يديه على راسه ودي عينه من الناس اللي مش صح ومحتاجه مساعده نفسيه ولكن انت مش بطل عشان تشيل عك غيرك وتستحمل إهانته أو إهماله ليك .. عززوا نفسكم وحبوا نفسكم …بلاش تحبوا غيركم وتفضلوه على نفسكم ..نفسك دي اللي بقيالك..قيمتك ومكانتك فعيونك وعيون غيرك مهمه..اوعى تصغر نفسك ولا تجري ورا حد ..عشان حقيقي هتتصدم من ردود أفعال ناقصه ومريضه وهترجع تقول أنا اللي عملت فنفسي كدا .. دا مش تخلي يندرج تحت بند النداله..دا تخلي يندرج تحت بند صحتي النفسية اولى واهم 
