بقلم هبة حسين
شد إنتباهى تتر مسلسل المداح الذي عرض في شهر رمضان المعظم الماضي اعاده الله علينا بالخير واليمن والبركات قولت ادلكم على معنى كلمات التتر وبعض من الاسرار عن العالم الخفى.
اولا احب اشكر الفنان حماده هلال على أدائه و تجسيد للدور ببراعه وفعلا بيمثل كتير من حياة المعالجين الروحانين والنورانين الصادقين.
اللى هدفهم نشر النور والاستشفاء والخير والسلام والتصدى للظلام والشر والاذى والطاقات السلبيه.
كل اللى عندهم طاقات نورانيه وشفائيه ومواهب روحانيه بيكونوا هدف لكبار ملوك الجن والشيطان علشان يجندوهم فى خدمه الشر والسحر والأذى ويستغلوا كل طاقاتهم ومواهبهم وقدراتهم الروحانيه اللى ربنا وهبها ليهم.
ولما النورانين بيرفضوا بقبول العهد بتبدأ عليهم الحرب والهجوم وحياتهم كلها بتتقلب لجحيم.
أنا و روحانيين كتير بنفهم بعض الكلمات اللى ليها معانى مخفيه.
(تتر المسلسل كلماته بتقول ايه):-
(لقيناك حابس): معناها لاقيناك متحصن وعندك المقدره على حبس الجن.
(فجيناك لابس): بيحضروا حواليه متلبسين فى شكل إنسان.
(لقيناك راسى) : يعنى ناضج وحكيم وهادى.
(خليناك حايس) : بدأوا يعملوا عليه هجوم ويعرضوا لمشاكل و أزمات فى حياته علشان يخلوا رأسه محتاسه ومشوشه.
(شجينا جدارك) : إخترقتنا هالتك وطاقتك واخترقنا التحصين اللى انت محمى بيه علشان يعرفوا يتحكموا فيه.
(نورنا زار دارك) : بقوا يدخلوا بيته كتير علشان يضايقوه ويضايقوا أهل بيته.
(صيرنا زوراك) : ملازمينوا فى كل مكان.
(فرطو حروفك) : السحره من الإنس والجن بيستخدموا طاقه حروف الأشخاص علشان يستخرجوا القيمه العدديه من الحروف اللى هيعملوا عليها السحر مع التعاويذ والطلاسم.
واى معلومات بيوصل ليها اى معالج روحانى نورانى يبدأ الجن والشيطان يشتتوا أفكاره علشان ما يوصلش للحقيقة.
هو ده دور عمال النور الشفائين والشخص الزوهرى والشامان الشفائين كلهم بيحاربوا الظلام وبيحولوا الظلام والطاقات الظلاميه اللى نور وطاقات ايجابيه وحمايه وشفائيه.
علشان كده هما دول اكتر فئه بتتحارب من شيطان الأنس والجن على الأرض لان دورهم على الأرض محاربه كل العوالم الخفيه ويعملوا توازن للترددات والذبذبات الايجابيه والنوارنيه والشفائيه على الأرض ونشر المحبه والخير والسلام والاستشفاء.
لذلك هتلاقيهم اكتر ناس متألمين وحياتهم كلها مدمره لأنهم بيحاربوا طاقات ظلاميه قويه حتى الأشخاص اللى بيساعدوهم على علاجهم للاسف بيتاذوا بسببهم.
الناس متخيله ان حياة اى شخص روحانى عندهم مواهب وقدرات روحانيه قادر يعمل المستحيل فى حياته وسعيد ومرتاح فى حياته.
ما يعرفوش على قد نعمة البصيره للاسف بتكون اوقات هى نقمه عليه والنور اللى عندهم هو اول واحد ممكن يتحرق بسببه.
لانه بيجاهد شيطانه وقرينه ونفسه الاماره بالسوء والنفس الضعيفه اللى جواه قبل ما يحارب الجبهات الخفيه الاخرى والعالم الخارجى.
عارفه إن مهمتك كخادم نور روحانى وشفائى على الأرض هى خدمة صعبه ومتعبه لكن إفتكر إنك إنت من المختارين اللى ربنا ميزهم وإختارهم علشان تكون جند من جنود الله على الأرض وعارفه إنك موجوع وحزين ومرهق وتعبان.
كل اللى هقدر اقوله ليك استعين دايما بربنا فى خدمتك علشان يقويك ويحميك ويسندك.
هى حرب مستمره إلى أن نصل للابديه فى السما ما بين النور والظلام وما بين الخير والشر.
مهما كان قوة الشر والظلام فالله وجنوده أقوى بنورهم.
كل الجن والشياطين الكفار هما فقط اللى بيتحبسوا فى رمضان لكن الجن المسلم العلوى مش بيتحبسوا.
كل أحداث المسلسل المداح هى موجوده حقيقه فى واقعنا.
عايزه أقولكوا للاسف أكتر أشخاص ممكن بتاذى بالسحر هما بيكونوا أقرب ناس ليك عمرك ما هتتوقع أبدا إن يوصل الشر والحقد والغل لقلوبهم لدرجة الأذى والخراب والدمار لحياتك بأسوأ أنواع السحر والشر.
خدوها منى نصيحه كمعالج روحانى ما تشربوش ولا تاكلوا عند اى حد مش متأكدين من محبتوا ليكوا.
ما تدخلوش بيتكوا اى حد مش متأكدين من محبتوا ليكوا.
هدومكوا لا تسلفوها لأى حد ولا تاخدوا لبس من اى حد وتلبسوها.
الوقايه خير من العلاج ممكن تتنقل ليك اى طاقات سلبيه من خلال اللبس.
اهم حاجه التحصين الروحى والتنضيف الطاقى دايما لبيتك ولجسدك علشان تبقى مطمن ومتحصن دايما.
واهم حاجه انك تحافظ على طهارتك وصلواتك وعلاقتك بربنا دايما.
ربنا يبعد عننا جميعا كل شر ويرفع عن كل مبتلى بأى طاقات سلبيه ويبطل جميع الاسحار وينتقم من السحره وكل من حرض على السحر والأذى وكل اعمال الشر وربنا يجعل كيدهم فى نحورهم ويشغلهم فى انفسهم ويرد عليهم اى اذى بيأذوا بيه غيرهم آمين يارب العالمين.
