مقدمة:-
اسمع ياواد وصية ابوك
ده لو كل الخلق حبوك
مش ربع حبي هايدوك
( فأسمع ياولدي وصية ابوك )
ده في قلبي محفور مكانك
والعمر يهون عشانك
ربنا يحقق احلامك
واشوفك سلطان زمانك
اسمع كلامي وتعمل بيه
دستور زمانك ده تخليه
وحياتك تبنيها عليه
اوعاك في يوم تفرط فيه
ركز ياولدي وافهم كلامي
مش عايزك تقاسي ولا تعاني
مش عايز الزمن يلعب بيك
ولا مره تيجي الدنيا عليك
القرار :-
– اسمع ياواد وخد مني
ركز معايا وافهمني
افهم ياولدي معني الكلام
نفذه هاتعيش راجل تمام
* خلي الأصول متأصله فيك
هاتغلي قيمتك وتعليك
والكل يتمني يماشيك
واللي يصاحبك يتشرف بيك
* خليك ياولدي راجل متين
بتحب كل الناس وامين
حكيم في افعالك ورزين
ضهر وسند للمحتاجين
* اوعاك تيجي علي مسكين
هاتروح من ربنا ساعتها فين
ده فعل ناس اشرار قاسيين
بقلوب حجر واحساس جاحدين
* اوعاك تماشي الناس الدون
خسيس طريقهم وملعون
بالخبث والنداله مسكون
والطيب فيه مدفون
* اكسب ياولدي اللي حواليك
حتي عدوك حببه فيك
هتلاقي كل الناس جنبيك
وعايشينلك خاتم في ايديك
* ابعد ياولدي عن الحريم
دي قلوب جوينه وفكر لئيم
وصحبتهم آخرتها جحيم
وجيب فاضي من غير مليم
* حرص ياولدي ومتخونش
ولحد غيرك متأمنش
ده زمن صعب متستهونش
وفيه ناس كتير متتأمنش
* اوعاك ياولدي تغيب عني
دايماً عليك تطمني
اوعاك ياغالي تروح مني
ده البعد عنك يقتلني
* واهم نصيحه هاقولهالك
وماتشيلهاش من بالك
دي اللي هاتحدد افعالك
واللي هاترسم احوالك
اوعاك واوعاك من الكيف
ده كله وهم وذل وزييف
هايقلب ربيعك لخريف
ومش هتلاقي حق الرغيف
سكته واعره ماتسلكهاش
نهايتها ندم ماتمشيهاش
والصحه فيها ضايعه بلاش
ارجوك ياولدي ماتروحلهاش
وكده يكون خلص الكلام
وقبل ماقولك سلام
بدعيلك يابني بالنجاح
وتكون في حياتك مرتاح
بدعيلك يابني براحة البال
وتعيش مبسوط في احسن حال
وتكون راضي في حياتك
قريب من ربك وصلاتك
واخيراً هاقول سلام
اوعاك ياواد تنسي الكلام
احفظه في قلبك وفي عقلك
ده نجحوا بيه اللي قبلك
#منسي
